Gjykimi i tij në sfidën Shqipëri-Izrael ishte jo pak i diskutuar. Mbi të gjithë ishin tifozët kuqezi, që e akuzuan Deniz Aytekin, si shkaktarin që solli disfatën 0-3 të skuadrës së De Biazit. Dy kartonëve e kuq për Gjimshitit e Berishën, të shoqëruar me penallti, u konsideruan si vendime të padrejtë. Vetëm pak minuta pas fundit të ndeshjes, në profilin e gjyqtarit në Facebook vërshuan ofendimet dhe akuzat, duke e detyruar atë ta mbyllë adresën për disa ditë. Pas kësaj mase parandaluese të marrë si rrjedhojë e valës së komenteve ofenduese, Aytekin e ka rihapur profiling në rrjetin social, raporton Tring sport. E madje ka dashur të bëjë sqarim publik përmes një statusi, në lidhje me veprimet e tij në ndeshjen e së shtunës së kaluar. Pikërisht në lidhje me Shqipëri-Izrael, gjyqtari ka theksuar se pasi “e ka riparë edhe një herë të plotë videon e ndeshjes, është bindur se pa përjashtim të gjitha vendimet e tij kanë qenë serioze dhe korrekte në raport me rregulloren”. Sipas tij, veprimi i Gjimshitit apo goditja e portierit Berisha meritonin padyshim karton të kuq. Gjithsesi, fakt është që në kaluarën Aytekin është shfaqur konfuz në disa raste penalltish në Bundesligën gjermane. Në një rast gati të ngjashëm me atë të Gjimshitit, në sfidën Këln-Hamburg të vitit 2015 ai nxorri me të kuq mbrojtesin Spahiç dhe akordoi penallti. Megjithëse në mediat gjermane e konsideruan si faull inekzistent. Ndërsa në një tjetër ndeshje mes Frankfurtit e Shtutgartit, akordoi 11-metërsh, për ta kthyer më pas vendimin e tij, si pasojë e konsultës me vijërojtësin, që i tregoi se kishte gabuar.
Gjyqtari Aytekin: Do t’i nxirrja sërish kartonat e kuq për Gjimshitin e Berishën
