Gjykata Ndërkombëtare Penale ka lëshuar urdhra arresti për presidentin rus Vladimir Putin dhe Maria Lvova-Belova, një anëtare e qeverisë së Putinit, raporton CNN.
Lvova Belova është zyrtarja në qendër të skemës së supozuar për të dëbuar me forcë mijëra fëmijë ukrainas në Rusi.
Gjykata Ndërkombëtare Penale në një njoftim sqaroi se Putin dhe Lvova-Belova janë përgjegjës për krimin e luftës të dëbimit të paligjshëm të popullsisë (fëmijëve) dhe atë të transferimit të paligjshëm të tyre nga zonat e pushtuara të Ukrainës në Federatën Ruse.
Sipas Shteteve të Bashkuara dhe disa qeverive evropiane, administrata e Putinit ka zbatuar një skemë për të dëbuar me forcë mijëra fëmijë ukrainas në Rusi, shpesh në një rrjet prej dhjetëra kampesh, ku të miturit i nënshtrohen riedukimit politik.
“Përpjekjet e Lvova-Belova përfshijnë në mënyrë specifike birësimin e detyruar të fëmijëve ukrainas në familjet ruse, të ashtuquajturin ‘edukim patriotik’ të fëmijëve ukrainas, ndryshime legjislative për të përshpejtuar dhënien e shtetësisë së Federatës Ruse për fëmijët ukrainas dhe largimin e qëllimshëm të fëmijëve ukrainas. nga forcat ruse”, tha Thesari i SHBA në shtator.
Gjykata Ndërkombëtare Penale në deklaratën për mediat bëri me dije se këto akuza janë të arsyetuara nga faktet.
