Duket se lëshimi i urdhërarrestit nga Gjykata Ndërkombëtare Penale për kryeministrin izraelit Benjamin Netanjahu dhe ish-ministrin e Mbrojtjes të vendit të tij Gallant e ka ndarë botën në dy pjesë. Ka vende që e mbështesin dhe të tjerë që janë kundër.
Reagimi i fundit ka ardhur nga kryeministri i Hungarisë Viktor Orban i cili ka thënë se do e ftojë liderin izraelit në vendin e tij dhe se nuk do të arrestohet duke hedhur kështu poshtë vendimin.
“Sot, do ta ftoj kryeministrin e Izraelit, Netanyahun, për një vizitë në Hungari dhe në atë ftesë, do ta siguroj atë se, nëse vjen, vendimi i GJNP-së nuk do të ketë efekt në Hungari. Ne nuk do ta zbatojmë përmbajtjen e tij”, deklaroi Orban.
Ndërkohë më herët edhe Shtëpia e Bardhë e ka dënuar fuqishëm vendimin e Gjykatës, ndërsa shefi për politikë të jashtme dhe siguri i Bashkimit Evropian, Josep Borrell, ka thënë se urdhërarrestet nuk janë politike dhe të gjitha vendet anëtare të unionit duhet ta respektojnë dhe zbatojnë urdhrin e gjykatës.
Ndërkohë nga ana tjetër, ministri i Mbrojtjes së Italisë, Guido Crosseto, pavarësisht se e konsideron të gabuar ka bërë me dije se vendi i tij do të duhet ta zbatojë vendimin.
Po ashtu Holanda, Irlanda dhe Sllovenia bënë me dije së do të zbatonin urdhrin e Gjykatës Ndërkombëtare Penale.
Ndërsa ministria e Jashtme e Çekisë, duke iu përgjigjur vendimit të Gjykatës Penale Ndërkombëtare tha se Praga do t’i respektojë detyrimet e saj nga ligji ndërkombëtar.
Megjithatë, kryeministri i vendit, Petr Fiala, e quajti të “pavend” këtë hap.
Nga ana tjetër Gjermania është duke “shqyrtuar” se si t’i përgjigjet Gjykatës Ndërkombëtare Penale për lëshimin e një urdhër-arresti për Netanyahun. Kështu bëri me dije këtë të premte ministrja e Jashtme gjermane Annalena Baerbock./vizionplus.tv
