Deputeti i opozitës parlamentare, Ralf Gjoni ka kërcënuar se nuk do ta japë votën e tij për miratimin e reformës zgjedhore nëse kjo e fundit nuk është e plotë dhe gjithëpërfshirëse. Në një dalje për mediat, Gjoni tha se kjo reformë është shumë e rëndësishme për hapjen e negociatave.
“Në këtë moment të gjitha energjitë duhen përqendruar te marrja e vendimit pozitiv nga KE për hapjen e negociatave. Në këtë kontekst, reforma elektorale tërësore është shumë e rëndësishme. Një reformë elektorale e pjesshme, sipërfaqësore dhe pa gjithë përfshirje, dhe këtu e kam fjalën për opozitën parlamentare e cila ka të drejtën e votës. Do të ishte e papranueshme dhe nuk do i shërbente integrimit të Shqipërisë. Unë konfirmoj si deputet, por besoj se flas dhe në emër të kolegëve deputetë që kanë propozuar zyrtarisht në Kuvend ndryshimin e sistemit. Ne nuk kemi ndërmend të bëhemi dele për të votuar një reformë sipërfaqësore që mund të përdoret si alibi politike për cilindo aktor politik. Pritshmëritë për të premten janë shumë të larta. Pa gjithëpërfshirje nuk do ketë reformë në parlament.”
4 përfaqesuesit politikë, Gjjiknuri, Bylykbashi, Vasili e Rudina Hajdari kanë raportuar para diplomatëve këtë të mërkurë për ecurinë e ndryshimeve ligjore për zgjedhjet dhe mësohet se ambasadorja amerikane Yuri Kim ka theksuar se nuk ka fitore 100% të palëve, por i rëndësishëm është qëndrimi në tavolinën e bisedimeve. Të njëjtin mesazh ka përcjellë për mediat edhe ambasadori i OSBE, Borchardt.
