Disa mesazhe në shishe të shkruara nga dy ushtarë australianë në vitin 1916 janë gjetur më shumë se një shekull më vonë në bregun jugperëndimor të Australisë.
BBC raporton se shënimet u shkruan vetëm disa ditë pasi ushtarët nisën udhëtimin për t’u bashkuar në frontet e luftës në Francë gjatë Luftës së Parë Botërore.
Njëri prej tyre, ushtari Malcolm Neville, i shkroi nënës së tij se ushqimi në bord ishte “shumë i mirë” dhe se ata ishin “të lumtur si Larry”. Disa muaj më vonë, ai u vra në aksion në moshën 28-vjeçare. Ushtari tjetër, William Harley, 37 vjeç, i mbijetoi luftës dhe u kthye në shtëpi.
Letërkëmbimet iu dorëzuan pasardhësve të tyre, të cilët mbetën të tronditur nga zbulimi. BBC raporton se shishja me mesazhet e dy ushtarëve u gjet në fillim të këtij muaji në plazhin e largët Wharton, në Australinë Perëndimore, nga një banore e zonës.
Deb Brown po vizitonte plazhin me bashkëshortin dhe vajzën e saj gjatë një prej udhëtimeve të tyre të zakonshme me motorë katër rrotësh për të pastruar mbeturinat, kur vunë re një shishe të trashë prej qelqi në rërë.
“Ne bëjmë shumë pastrim në plazhet tona dhe nuk kalojmë kurrë pranë një mbeturine pa e marrë. Kështu që kjo shishe e vogël po qëndronte aty duke pritur të merrej,” tha znj. Brown për agjencinë e lajmeve Associated Press.
Megjithëse letra ishte e lagur, të dyja mesazhet ishin ende të lexueshme, ndaj znj. Brown filloi të kërkonte familjet e ushtarëve për t’ua dorëzuar. Ajo gjeti mbesën e madhe të ushtarit Neville, Herbie Neville, duke kërkuar emrin e ushtarit dhe qytetin nga ai vinte në internet, pasi adresa e nënës së tij ishte përfshirë në mesazh.
Neville i tha ABC News se përvoja kishte qenë “e pabesueshme” për familjen e tij, veçanërisht për Marian Davies (mbesën e ushtarit Neville) e cila kujton xhaxhain e saj duke u nisur për luftë dhe që nuk u kthye më.
Letra e dytë, e shkruar nga ushtari William Harley, ishte adresuar thjesht për këdo që do ta gjente shishen, pasi nëna e tij kishte vdekur vite më parë.
Mbesa e ushtarit Harley, Ann Turner, i tha ABC-së se ajo dhe katër nipërit e mbetur të ushtarit ishin “plotësisht të tronditur” nga mesazhi.
“Vërtet e ndiejmë si një mrekulli dhe na duket sikur gjyshi ynë ka arritur të na prekë nga varri,” tha ajo.
“Ndjehem shumë emocionale kur shoh që ushtari tjetër i ri kishte një nënë për t’i shkruar, dhe mesazhi në shishe ishte për nënën e tij, ndërsa gjyshi ynë e kishte humbur nënën shumë kohë më parë, ndaj ai thjesht shkroi për gjetësin e shishes.”
Shishja ishte hedhur në det “diku në Bight”, thuhej në letrën e ushtarit Harley, duke iu referuar Gjirit të Madh Australian në bregun jugor të vendit.
Një profesor i oqeanografisë i tha ABC se shishja mund të ketë qenë në ujë vetëm për disa javë para se të mbërrinte në bregun e plazhit Wharton, ku mund të ketë qëndruar e varrosur për 100 vjet.
