RCS Sport & Events, organizatorja e eventeve sportive më të rëndësishme ndërkombëtare, ndër to dhe e Giro d’Italia, ka dërguar një letër falënderimi për Policinë e Shtetit shqiptar, pas përfundimit me sukses të tri etapave të zhvilluara në Shqipëri më 9, 10 dhe 11 maj 2025.
Në letrën zyrtare drejtuar autoriteteve shqiptare, RCS Sport & Events vlerëson maksimalisht angazhimin e Policisë së Shtetit në garantimin e sigurisë dhe mbarëvajtjes së garës.
Organizatorët theksojnë se rezultati i arritur ishte maksimal, jo vetëm në aspektin sportiv, por edhe në garantimin e rendit dhe sigurisë përgjatë gjithë itinerarit në territorin shqiptar.
“Shprehim konsideratën më të lartë për të gjitha strukturat e Policisë së Shtetit shqiptar.
Shërbimi i eskortës, i realizuar me përpikmëri nga efektivët e Policisë Rrugore, që shoqëruan çiklistët gjatë çdo faze të garës, si dhe siguria e garantuar në çdo pikë kritike të itinerarit, nga Policia e Shtetit, vërtetuan aftësinë organizative dhe shkallën e lartë të trajnimit të strukturave tuaja.
Rezultati i arrirë, si në aspektin sportiv ashtu dhe në sigurinë e garës, ka qenë maksimal, dhe është vlerësuar unanimisht nga mediat sportive, organizmat më të larta të çiklizmit ndërkombëtar, kolegji i komisarëve, drejtoria e garës, si dhe nga të gjitha skuadrat pjesëmarrëse”, shkruhej në letër.
/vizionplus.tv
