Kryetari i Partisë Demokratike Sali Berisha kërkoi sërish dorëheqjen e kryeministrit Edi Rama, duke e akuzuar si përgjegjës për dy çështjet që po hetohen nga Spaku; tenderat në infrastrukturë dhe tenderat në Agjencinë Kombëtare të Shoqërisë së Informacionit. Në një konferencë me gazetarët Berisha lajmëroi se të premten do të zhvillojë një takim me çdo faktor opozitar për betejën kundër qeverisë “Rama>
“Për të krijuar një bashkërendim, një front të gjerë kundër narko-regjimit të Edi Ramës dhe për të ndërmarrë të gjitha lëvizjet, protestat, demonstratat, revoltat e domosdoshme për largimin e tij një minutë e më parë. Për opozitën, bllokimi nga Edi Rama i heqjes së imunitetit të Lubi Ballukut, marrja në mbrojtje e delinkuentes Mirlinda Karçanaj, e njohur tashmë për abuzimet e tmerrshme me Ergys Agasin në favor të familjes Rama, janë një thirrje e madhe për shqiptarët për t’u ngritur në revoltë për t’i dhënë narko-diktatorit të tyre atë fund të turpshëm që pati narko-diktatori i Venezuelës”, tha Berisha.
Berisha akuzoi kryeministrin Edi Rama se po shkel kushtetutën e rregulloren e kuvendit, duke mos lejuar shqyrtimin e kërkesës së Spakut për imunitetin e zëvendëskryeministres Belinda Balluku
“Edi Rama, në vend të dorëheqjes së tij të menjëhershëm, iu bëri të ditur shqiptarëve se ai është i gatshëm të përdorë 83 mandatet e krimit për të mbrojtur miliardat e vjedhura prej tij dhe bashkëpunëtorët e tij”, shtoi kreu i PD.
Por Berisha artikuloi akuza të ashpra edhe ndaj Gjykatës Kushtetuese, e cila në datë 22 janar do të vendosë nëse Spaku dhe Gjykata e Posaçme ka apo jo të drejtë të pezullojë një ministër.
‘Gjykata Kushtetuese nuk është gjë tjetër vetëm një organizatë e shpifur e PS.”
Sipas Berishës Kushtetuesja ka aplikuar dy standarde, pasi legjitimoi kërkesën e kryeministrit Edi Rama kundër Spakut për rastin Balluku, por nuk legjitimoi kërkesën e 1/5 së deputetëve të kuvendit për rastin e tij edhe pse e drejta e tyre për të vënë në lëvizje Kushtetuesen është e pakufizuar./vizionplus.tv
