Kryepeshkopi i Shqipërisë, Joan Pelushi, u fronëzua sot në Katedralen “Ngjallja e Krishtit”, duke u ulur në fronin më të lartë të Kishës Ortodokse Autoqefale të Shqipërisë në orën 11:00 të kësaj të shtune. Ky moment shënon fillimin e ushtrimit të detyrës së tij si udhëheqës i Kishës Ortodokse në vend, duke hapur kështu një kapitull të ri në historinë e kishës shqiptare.
Qindra besimtarë, të pranishëm në ceremoni, ndoqën nga afër këtë ngjarje historike të rëndësishme për komunitetin ortodoks shqiptar, e cila shënon fronëzimin e parë të një kryepeshkopi shqiptar. Në ceremoni morën pjesë përfaqësues të shtetit dhe politikës shqiptare, përfshirë Presidentin Bajram Begaj, Ministri për Evropën dhe Punët e Jashtme Igli Hasani, Kryeparlamentaren Elisa Spiropali, zv.kryeministren Belinda Balluku, ministrat Pirro Vengu dhe Blendi Gonxhja, ish-presidentët Bamir Topi dhe Alfred Moisiu, deputetin Pandeli Majko, si dhe kreun e Partisë Demokratike, Sali Berisha.
Pjesëmarrës ishin gjithashtu krerët fetarë shqiptarë, përfshirë Kryegjyshin Botëror të Bektashinjve Baba Mondi, kreun e KMSH-së Bujar Spahiu, dhe Kryetarin e Këshillit Ndërfetar, Dom Gjergj Meta. Nga Greqia, ceremoninë e ndoqën Ministri i Mbrojtjes, Nikos Dendias, dhe Ministrja e Edukimit dhe Fesë, si përfaqësues të shtetit grek.
Një detaj i veçantë është mungesa e Kryeministrit grek Mitsotakis në këtë ngjarje, pas protagonizmit të tij në ceremoninë e lamtumirës së ish-kryepeshkopit të ndjerë, Anastas.
Fjalimi kryesor gjatë ceremonisë iu besua Kryepeshkopit Joan, i cili më pas u ul për herë të parë në fronin kryepiskopal, duke nisur kështu detyrën e tij të re. Në përfundim të ceremonisë, ai do të kryejë shërbesën e tij të parë si Kryepeshkop i Shqipërisë në Katedralen “Ngjallja e Krishtit”.
Gjithashtu, ai do të ketë për detyrë të zgjedhë pasuesin e tij në Mitropolinë e Korçës, ku ka shërbyer pa ndërprerje që nga viti 1998. Anastasi i Krujës është i pritur të jetë pasuesi i Joanit në këtë detyrë, pasi është anëtar i Sinodit, por ende nuk është Mitropolit.
