Kritikat e kryeministrit Rama ndaj vendeve anëtare të bashkimit europian për shpërndarjen e vaksinës anticovid, kanë sjellë reagimin e ambasadës franceze.
Një ditë më parë ambasada i ka nisur një letër ministrisë së jashtme, ku nënvizon se nuk është e përshtatshme të sulmosh një vend mik dhe aleat.
Shqetësimi i selisë diplomatike franceze lidhet me deklaratën e shefit të qeverisë se Franca ka stok vaksinash, të cilat nuk mund t’i përdorë dhe nuk i ndan me të tjerët.
“Përveç natyrës të pavërtetë të këtij informacioni, por që mund të jetë shumë i ndjeshëm për mendjet e njerëzve, kjo ambasadë konsideron se nuk është e përshtatshme të sulmosh në këtë mënyrë nominative një vend mik dhe aleat.” – shkruhet në letrën drejtuar ministrisë së Jashtme.
Ambasada ka sjellë në vëmendje se bashkimi europian është donatori më i madh në Shqipëri me më shumë se 100 milionë euro në sektore të ndryshëm.
