Kualifikimi për herë të dytë i Shqipërisë në fazën finale të një kampionati Europian një muaj më parë, tërhoqi vëmendjen e mediave botërore.
Por në Gjermani kualifikimi i kuqezinjve ka filluar të krijojë panik, pasi tashmë lojtarët me origjinë shqiptare të cilët deri tani kanë luajtur më kombëtaret e moshave të Gjermanisë mund t’i bashkohen Shqipërisë.
Prestigjozja “BILD” ka dhënë alarmin sa i përket një prej talenteve më të mëdhenj të U21 të Gjermanisë, Brajan Gruda, i cili po lë gjurmë edhe me klubin e Mainzit.
Sipas “BILD” Gruda mund të braktisë Gjermaninë për të luajtur me Shqipërinë, pasi FSHF ka nisur kontaktin me babain e lojtarit, një ish-futbollist i Vllaznisë së Shkodrës.
“Më kot deri tani”, shkruan e përditshmja gjermane, duke shpjeguar se për momentin, Gruda do të vazhdojë duke përfaqësuar Gjermaninë U21 me të cilën ka luajtur 5 ndeshje. /Vizionplus.tv/
