Studiuesi i epidemiologjisë, Taulant Muka shprehet se mosbindja civile nuk po i sjell vendit ndryshimin që i duhet. Në emisionin “Quo Vadis”, Muka shprehet se e vetmja formë për të rikthyer shpresën është krijimi i një pakti kombëtar përtej figurave të njëjta politike dhe rivendosja e shtyllave të shtetit.
“Unë nuk shoh nga ana e opozitës një reflektim dhe një rithemelim në sensin e kuadrove intelektuale që ata përfaqësojnë. Është e njëjta politikë që kanë 30 vite që akuzojnë njëri-tjetrin, por ndërkohë shqiptarët po largohen”, thotë ai. “Ka ardhur koha që ne si shoqëri të ulemi në tavolinë dhe të vendosim një pakt kombëtar, që shkon përtej Sali Berishës, përtej Edi Ramës, përtej Ilir Metës, përtej Lulzim Bashës dhe të vendosen shtyllat e para të një shteti që shikon drejt të ardhmes”, shtoi ai.
Muka u shpreh se “rrënimin” e vendit e has dhe në punën e tij të përditshme si akademik, duke nënvizuar se mungojnë investimet në arsim, teksa numrat e studentëve reduktohen si pasojë e largimit të të rinjve nga vendi.
