Vijon të jetë i lartë numri i hyrje-daljeve në pikën e kalimit kufitar të Qafë Thanës.
Burime zyrtare thanë për Vizion Plus se gjatë 24 orëve të fundit kanë hyrë e kanë dalë më shumë se 3100 shtetas të huaj e shqiptarë. Numri më i madh i lëvizjeve vazhdon të jetë ai i daljeve nga Shqipëria në drejtim të Maqedonisë së Veriut, pasi shqiptarët pas mbylljes të njëanshme të Kapshticës dhe kufizimeve të daljeve nga Kakavija në drejtim të Greqisë, si rrugë të vetme për të hyrë në shtetin helen kanë doganat maqedonase.
Gjatë 24 orëve të fundit nga vendi fqinj kanë hyrë drejt vendit tonë 1520 shtetas. Fluksi i hyrje-daljeve pritet të jetë me i lartë gjatë ditës së sotme, e diçka më tepër paraditen e së dielës.
Për të përballuar këtë fluks, autoritetet tona kufitare kanë shtuar numrin e sporteleve në hyrje dhe në dalje, duke punuar kështu me 5 sportele, 3 prej të cilëve në dalje.
Nga ana tjetër, gjatë këtyre orëve të fundit, nga Greqia, nëpërmjet pikës kufitare të Kapshticës kanë hyrë 254 shtetas si dhe 144 mjete.
