Zëdhënsja e fushatës në PD, Floriana Garo kërkoi mbështetjen e grave për opozitën, për të udhëhequr ndryshimin.
Përmes një deklarate për mediat, Garo u shpreh se është ky momenti që gratë të bëhen bashkë për të lënë pas tetë vitet e keqqeverisjes, sipas saj.
“Ne jemi gratë e këtij vendi dhe nuk arrijmë të shohim sesi kjo qeveri shkatërron jetët tona vit pas viti për 8 vite rresht. Dhe ne rrimë duarkryq. Ne shohim pagat minimale kaq të ulëta, taksat e larta, dhe qindra mijëra të papunë. Shohim familjet tona që nuk arrijnë ta jetojnë jetën me dinjitet. Shohim fëmijët tanë që ikin nga Shqipëria për një të ardhme më të mirë në vende të huaja. Shohim errësirën që po mbulon tokën tonë të dashur, të ardhmen tonë. Ne nuk mundemi të rrimë larg këtij realiteti dhe të shohim Shqipërinë pa rrugëdalje dhe pa të ardhme. Ne nuk duhet të rrime larg. Ne do të jemi forca e gruas, luaneshat që shtyjnë dhe udhëheqin ndryshimin për të cilin Shqipëria kaq kaq shumë nevojë. Është momenti ynë të bashkohemi e të kthehemi në një forcë të madhe e motivuese dhe të kthejmë shpresën tek familjet tona, fëmijët tanë, tek njerëzit tanë të dashur. Tek Shqipëria jonë e shtrenjtë. Me 25 Prill, gratë shqiptare do të sjellin ndryshimin duke votuar për Partinë Demokratike dhe Lulzim Bashën për të sjellë shpresën në jetët tona. Shqipëria fiton!”
