Tirana është gati për festat e Nëntorit, e bashkë me të edhe institucionet kulturore në vend, duke sjellë për të gjithë qytetarët dhe jo vetëm aktivitete që prej orëve të para të mëngjesit të kësaj të enjteje
Për herë të dytë do të mbahet “Parada e shqiptarëve”, ku mbi 300 grupe artistike nga trojet shqiptare si dhe shqiptarë nga diaspora, do zhvendosen në rrugët e kryeqytetit.
Parakalimi do të filloje nga sheshi “Nënë Tereza” për të vijuar deri në sheshin “Skënderbej”. E sigurisht ky organizim ka si qëllim të përcjellë mesazhin për bashkimin e Shqipërisë veçanërisht gjatë festave.
“Në datë 28 do fillojë te sheshi “Nënë Tereza” përgjatë bulevardit “Dëshmorët e Kombit”. Do të manifestojnë, do të parakalojnë, do të gëzojnë krahas 10 mijë të ftuarve që kanë ardhur edhe mbi 300 ansamble të ndryshme, grupe të ndryshme folklorike për tu grumbulluar te sheshi “Skënderbej” ku do bëhet ngritja simbolike e flamurit të 28 Nëntorit”, tha Andi Seferi, nënkryetar i Bashkisë Tiranë.
Festa në Tiranë do të zgjasë gjatë, pasi organizimet e menduara për datën 29 për shkak të kushteve atmosferike do të shtyhen për në datën 2 dhjetor.
“Ndoshta do të mund të spostohen për në datë 2 dhjetor si Nata e bardhë ashtu dhe aktivitete e tjera të datës 29. Aktivitete që do të përkojnë dhe me ndezjen e dritave të pemës së Vitit të Ri tashmë tradicionale në sheshin “Skënderbej””, shtoi Andi Seferi
Për artdashësit kanë menduar edhe teatrot në vend. Sonte në mbrëmje Teatri i Operës dhe Baletit sjell koncertin vokalo-simfonik “Nëntori i yjeve të artë.”
Edhe Teatri Kombëtar do të ngjis në skenë shfaqjen “pas luftës, kush jemi ne” të regjisorit Robert Nuha, e cila do të jetë falas për të gjithë publikun. Ndërsa në sallën e teatrit eksperimental rikthehet vepra “Agnesa e zotit” për dy net radhazi më datë 28 dhe 29. /vizionplus.tv
