Festa e mollëve në Korçë, fermerët: Prodhimi i këtij viti më i pakët

Për të disatin vit radhazi, është mbajtur Festa e Mollës në Dvoran të Korçës. Fermerët kanë patur arsye për të festuar, pasi çmimi i frutit të mollës ka shkuar deri në 80 lek kg, pothuajse dyfishi i vitit të kaluar

Ferdinand Ali, një fermer i fushës së Dvoranit tregon se pavarësisht çmimit të lartë, rendimenti i këtij viti është i ulët për shkak të ngricave në fillim të pranverës.

Ndërkohë një turiste amerikane ka gatuar ëmbëlsira të ndryshme me mollë. Ajo thotë se lekët që do të përfitohen nga shitjet e këtyre ëmbëlsirave do të shkojnë për restaurimin e një klase të shkollës së fshatit.

“Kemi shumë ëmbëlsira me bazë mollën. Së bashku me studentët e mi kemi sjellë variacione të ndryshme ëmbëlsirash për të afruar kështu klientët për t’i provuar dhe pse jo dhe për t’i blerë. Me të ardhurat që do të mbledhim nga shitja e tyre kemi një mision shumë të rëndësishëm për të përmbushur. Ne duam që këto para të shkojnë për restaurimin e një klase në shkollën e fshatit”, thotë Victoria Valles.

Në qarkun e Korçës janë rreth 4 200 hektarë me mollë të variteteve të ndryshme, ndërsa vitet e fundit prodhimi po eksportohet drejt vendeve të rajonit./vizionplus.tv