Presidenti Ilir Meta kërkoi nga autoritetet që të reagojnë menjëherë për t’i dhënë një zgjidhje situatës së krijuar tek spitali Infektiv.
Këtë të enjte, kreu i shtetit postoi në “Facebook” fotografi të disa qytetarëve që po rrinin grumbull në ambientet e jashtme të spitalit.
Sipas Metës, ata janë familjarë të pacientëve të shtrirë brenda dhe meritojnë të trajtohen me dinjitet.
“Familjarët e qytetarëve të prekur nga COVID-19 meritojnë të trajtohen denjësisht dhe të informohen me transparencë të plotë për shëndetin e të dashurve të tyre, të cilëve ju uroj shërim sa më të shpejtë. Pamjet shqetësuese të publikuara sot në media për grumbullime të shumta në ambientet e jashtme të Spitalit Infektiv në Tiranë kërkojnë reflektim të menjëhershëm.”
Një ditë më parë presidenti i bëri thirrje qeverisë që të shtojë buxhetin për sektorin e shëndetësisë, me qëllim që pandemia të përballohet me sukses.
