Erdogan humbet Stambollin por “ngushëllohet” me votën popullore

Rezultatet paraprake jozyrtare të zgjedhjeve vendore në Turqi flasin për një fitore të dhimbshme të presidentit Recep Taip Erdogan pasi 3 kryeqendrat më të mëdha të vendit Ankaraja, Stambolli dhe Izmiri i kanë thënë “jo” sundimit 16 vjeçar të partisë së tij.

Presidenti turk joentuziast tha për mediat se zgjedhjet e 31 marsit përfunduan me një pjekuri demokratike.

Recep Taip Erdogan: “Rezultatet tregojnë se Partia për Drejtësi dhe Zhvillim nga këto zgjedhje ka dalë përsëri forca e parë politike me një diferencë të madhe, ashtu siç ndodhi edhe në zgjedhjet e 3 nëntorit 2002. Ne kemi dalë të parët në këtë garë zgjedhore edhe në bazë të aleancave. Patjetër që ka bashki që i kemi fituar dhe humbur. Ky është vlerësimi i popullit tonë dhe duhet pranuar. Vullneti i popullit u pasqyrua edhe një herë në kutinë e votimit me një pjesëmarrje të lartë. Uroj që rezultatet zgjedhore të jenë të dobishme për vendin.”

Komisioni i Lartë Zgjedhor i Turqisë nuk e ka thënë ende fjalën e fundit pasi dhjetëra kuti gjenden në proces ankimimi. Megjithatë, sipas të dhënave paraprake, në rang kombëtar partia e Erdogan ka fituar më shumë se 51% të votave.

Presidenti turk ka paralajmëruar ankimimin e rezultatit për qendrat e mëdha, edhe pse partia e tij ka të gjithë mekanizmat e pushtetit në dorë.

Zgjedhjet lokale në Turqi janë ndjekur me vëmendje edhe nga ndërkombëtarët. Zëdhënësja e BE-së Maja Kocijançiç vlerësoi pjesëmarrjen e lartë të qytetarëve ne proces. 57 milionë turq u regjistruan në këto zgjedhje ndërsa pjesëmarrja në votim ishte rreth 85%.