Spektakli i 21-të Prime i “Ferma VIP” në ekranin e Vizion Plus solli emocione të forta për fermerët dhe publikun. Një natë që nisi me tension dhe përfundoi me surpriza, vendime të papritura, largimin e një prej fermereve më të komentuara, si dhe shpalljen e finalistit të dytë.
Pas televotimit të hapur të premten, publiku kishte në dorë fatin e fermerëve. Katër më pak të votuarit, Ylli, Elinara, Esteri dhe Andrea, u përballën në një sfidë vendimtare. Sfidë nga e cila Andrea rezultoi fitues, ndërsa tre fermerët e tjerë i priste një tjetër televotim.
Por Agai, si gjithmonë, u tregua surprizues. Erandit, si një prej tre konkurrentëve më të votuar, iu dha Hajmalia e fatit, nëpërmjet së cilës do duhej të merrte një vendim të rëndësishëm që ndryshoi rrjedhën e lojës.
Erandi kishte dy mundësi: të shpallej automatikisht finalist i dytë ose të shpëtonte një nga fermerët e rrezikuar, për ta sfiduar më pas për një vend në finale. Ai zgjodhi të siguronte për vete vendin në finale, duke i lënë tre të tjerët në dorë të televotimit të publikut.
Në fund të votimit, Ester ishte ajo që u largua nga gara, duke humbur mundësinë për të qenë pjesë e finales së madhe më 20 qershor. Largimi i saj u shoqërua me emocione të forta, ndërsa televotimi mbeti i hapur për të përzgjedhur finalistin e tretë mes Big Bastës dhe Anduelit, si dy më të pëlqyer të publikut.
Teksa numërimi i ditëve mbrapsht ka nisur, spektakli i së hënës nuk kaloi pa surpriza. Rrëfimi i linjës së jetës së Big Bastës shpalosi një tjetër anë të ndjeshme të fermerit. Ndërsa një vizitë e veçantë nga prindërit e tij i dhuroi një prej momenteve dhe kujtimeve më të bukura të rrugëtimit në Ferma VIP.
Në përfundim, siç është kthyer tashmë në traditë, Ferma u mbyll me muzikë të bukur dhe momente argëtuese, ndërsa gjatë kësaj nate u konfirmua edhe një herë se loja po hyn në fazën më të nxehtë, ku çdo vendim, debat apo emocion ndikon drejtpërdrejt në rrugën drejt finales së madhe.
/vizionplus.tv
