Anëtari i Kryesisë së Partisë Demokratike, Enno Bozdo ka reaguar pas ndarjes nga jeta të Nexhmije Hoxhës, për të cilën tha se shpreson që të vuajë pafund “në rrethin e fundit të ferrit”. Ai shton se Nexhmija vdiq e qetë dhe e papenduar për krimet e tmerrshme që ka kryer së bashku me bashkëshortin e saj ndaj shqiptarëve.
Përmes një postimi në “Facebook”, Bozdo shprehet se nxjerrja në shesh e të vërtetës është borxhi i përjetshëm për fëmijët që duhet shlyer me çdo kusht.
“Nexhmije Hoxha vdiq. E papenduar deri në fund për krimet e tmerrshme të saj dhe të bashkëshortit të saj. Vdiq në paqe me vetveten, madje duke i justifikuar vrasjet makabre, zhbërjen e Shqipërisë, masakrën mbi shqiptarët, varfërinë ekstreme, tmerrin dhe absurdin, në emër të ideologjisë më gjaksore të shekullit XX. Nexhmija jetoi jetën e saj. Gjyqin final e ka me Krijuesin dhe unë mendoj se Ai do ta dërgojë në rrethin e fundit të ferrit. Shpresoj që ajo të vuajë pafund aty. Por nuk mund të presim që punën tonë ta bëjë gjithmonë Zoti dhe ne të mos bëjmë asgjë. Nxjerrja në shesh e të vërtetës është borxhi ynë i përjetshëm për fëmijët tanë. Borxh që duhet ta shlyejmë me cdo kusht! Përballë të keqes së madhe që Nexhmijet personifikojnë, ne kemi 30 vjet që qëndrojmë duarlidhur. Historia po na gjykon rëndë për këtë. Cfarë ndodh sot në Shqipëri është rrjedhojë e drejpërdrejtë e mpirjes tonë përballë të keqes! Nexhmia iku sot e qetë dhe e papenduar. Po sot, kushedi sa shqiptarë kanë ikur ose planifikojnë të ikin nga Shqipëria. Dhe ne vazhdojmë të qëndrojmë sikur s`ka ndodhur asgjë!”
Ndër të tjera, demokrati theksoi se Nexhmije Hoxha u nda nga jeta e qetë dhe se shoqëria shqiptare nuk pati kurrë guxim t’i japë komunizmit vendin që meriton.
“Ne bëmë shumë pak për të mbajtur gjallë kujtesën e viteve më të rënda të historisë tonë. Aq pak sa shqiptarët sot nuk e kanë aspak problem portretin e Enver Hoxhës në festat dhe ceremonitë zyrtare. As intervistat romantike te Nexhmijes në të përditshmet tona. As qeverinë e cila përkulet me nderim përpara portretit të Enverit. Të rinjtë sot e njohin atë periudhë vetëm nga filmat e realizmit socialist. I shohin këto filma dhe mendojnë se ka jeta ka qenë interesante në atë kohë. Shqiptarët ende lexojnë sot për Byronë Politike të Hoxhës, por nuk lexojë për martirët që luftuan totalitarizmin e kuq me jetën e tyre.”
