Preç Zogaj ka rrëfyer detaje të pathëna nga jeta e tij, teksa ishte i ftuar në emisionin “Vizioni i Pasdites” të moderators Brikena Prifti.
Zogaj foli për poezinë e tj dhe zbuloi se librin e parë e ka pasur të vështirë për ta botuar.
“Kam pasur vështirësi ta botoj librin e parë sepse e kam dërguar në shtëpinë botuese Naim Frashëri në moshën 19 vjeç dhe më është dashur ta dërgoj disa herë sepse nuk ma botonin. Flasim për vitin për vitin 1980, letërsia në atë kohë nuk ishte e lirë. Kishte disa tema që i kërkonin. Unë nuk është se i refuzoja temat ideologjike, por nuk më përshtateshin.
Botova librin e parë, pastaj pa ndërprerje kam botuar 12 libra me poezi. Kam botuar 4 libra me poezi para vitit 1990 dhe 8 pas vitit 1990”, tha ai.
Më tej Zogaj rrëfeu edhe betejën e tij për të vazhduar shkollën e lartë, për shkak të biografisë së familjes së tij.
“Unë në rininë e hershme kam ëndërruar të bëhesha poet se kam qenë lexues jo i zakonshëm. Dhe shokët e kanë vënë re zakonin tim për të mësuar përmendësh. Gazetaria ka ardhur natyrshëm në jetën time sepse unë më në fund pas shumë vështirësishë, arrita të regjistrohem në universitet për Gjuhë Letërsi pa shkëputje nga puna. Kam ndenjur rreth 3 vjet duke pritur të më dalë shkolla e lartë. E kisha mesataren 10, por kisha pengesa nga biografia e prindërve. Kam pasur një udhëtim jo të zakonshëm në raport me bashkëmoshatarët e mi.
Pasi mbarova studimet u caktova mësues në një fshat në Lezhë. Prej atje, me ndihmën e miqve që kishin filluar punë nëpër redaksi të ndryshme në Tiranë, kam ardhur te gazeta Zëri i Rinisë”, tregoi Zogaj. /vizionplus.tv
