Një trup i pajetë është konstatuar nga një bari, këtë të Premte në rezervuarin e fshatit Rrenxë të Njësisë Administrative Kastriot në Bashkinë e Dibrës.
Pas konstatimit të trupit, bariu i zonës ka njoftuar menjëherë policinë e Dibrës e cila ka shkuar në vendin e ngjarjes.
Pas afro katër orësh është bërë e mundur që të identifikohet e mbytura e seksit femër.
Sipas policisë së Dibrës, e mbytura në rezervuarin e Rrenxës është Shpëtime Shehu rreth 27 vjeçe, nga fshati Vrenjt i Njësisë Administrative Kastriot. Ende nuk dihen shkaqet e vërteta që kanë çuar 27 vjeçaren të gjendej e mbytur në këtë rezervuarë, ndërsa burime ende jo zyrtare thanë se dyshohet se ka probleme të shëndetit mendor.
Nga kqyrja paraprake e trupit nuk janë konstatuar shenja dhune, ndërsa pritet eskpertiza mjekoligjore për të hedhur më shumë dritë mbi shkaqet e vdekjes. Policia ka nisur hetimet për zbardhjen e rrethanave të vërteta të kësaj ngjarjeje të rëndë.
