Kreu i Partisë Republokane, Fatmir Mediu, vendimin e KAS për të vendosur emrin e Ilir Metës në fletën e votimit e ka konsideruar një truk politik për të penguar koalicionin “Bashkë Fitojmë”.
Në një prononcim për mediat pas një takimi me strukturat drejtuese të PR dhe të koalicionit “Bashkë Fitojmë”, Mediu shtoi se KAS ka kundërshtuar veten përmes këtij vendimi.
Ai thekson se bëhet fjalë për një lojë politike të kryeministrit Rama që po përdor çdo instrument kundër opozitës.
“Unë mendoj që këto janë truke elektorale që po përdoren, sipas Kodit elektoral qartësisht thuhet që koalicioni është bashkim partish që vendosin se kush është partia drejtuese dhe po ashtu vendosin se kush e drejto e koalicioni, dhe drejtimi i koalicionit nuk do të thotë se kush do jetë kryetar partie, drejtimi i koalicionit mund të bëhet edhe nga një kandidat për kryetar bashkia apo një autoritet politik i së djathtës. Të gjitha këto përpiqen të ecin me lojën politike që Edi Rama ka bërë prej kohësh, e para për të mos lejuar koalicione dhe e dyta për t’i formuar ato siç duan. Gjithashtu bien në konflikt edhe me vendimet që ka marrë më përpara KAS në raport me fletën e votimit që duhet apo sduhet të ishte z. Basha. Pra duket që ka një qëllim politik dhe këto janë kthyer në instrumenta politike për të sabotuar procesin zgjedhor”, tha Mediu.
Deklaratave të Ramës se nuk do të mbështesë bashkitë që do drejtohen nga emrat e koalicionit “Bashkë Fitojmë”, Mediu iu përgjigj duke thënë se taksat e qytetarëve nuk mund të administrohen në bazë të preferencave të kryeministrit.
