Struktura e Posaçme kundër Korrupsionit dhe Krimit të Organizuar ka kërkuar konfiskimin e pasurisë për dy anëtarë të grupit kriminal Jusel Mici dhe Mendim Domi.
Në total janë 8 pasuri, për të cilat SPAK kërkon konfiskimin.
Pasuritë për të cilat kërkohet konfiskimi:
-Apartamente dhe njësi banimi në Tiranë;
-Njësi shërbimi me sipërfaqe të konsiderueshme në zonën e Bulevardit të Ri;
-Vila në Gjirin e Lalzit dhe në komplekse turistike rezidenciale;
-Sipërfaqe toke (arë) në zonat Mazrek, Kashar dhe Sauk;
-Garazhe në Njësinë Administrative nr. 9, Tiranë;
-Automjete të markave BMW dhe Audi;
-Kuota pjesëmarrjeje në shoqërinë tregtare “SUPER FOODS” sh.p.k.;
-Llogari bankare në Union Bank me balanca në euro dhe lekë.
Jusel Mici dhe Mendim Domi, të goditur në dhjetor 2022 , për mashtrim përmes call center dhe grup i strukturuar kriminal, aktualisht, të dy janë në gjykim për akuzat që rëndojnë ndaj tyre.
Nga hetimet që SPAK ka kryer deri më tani, ka rezultuar se këto janë pasuri të pajustifikuara nga burime të ligjshme, të cilat dyshohet se janë rezultat i veprimtarisë së kriminale të mashtrimit përmes call center të qytetarëve europian, italianë, spanjollë dhe gjermanë, duke sjellë një dëm prej rreth 15 milionë eurosh.
Ata kontaktoheshin përmes telefonit, i bindnin të investonin në instrumente financiare realisht inekzistente, me premtimin e normave të larta të kthimit, por përfundonin duke humbur investimet e tyre. Në dhjetor 2022, operacioni u zhvillua në Shqipëri dhe Itali, ku u kontrolluan call center, banesa dhe ambiente të tjera.
