Bashkëpunimi intensiv mes INTERPOL Tirana dhe strukturave homologe në Itali dhe Greqi ka çuar në finalizimin me sukses të procedurave të ekstradimit për katër shtetas të akuzuar ose dënuar për veprimtari kriminale në fushën e narkotikëve.
Falë koordinimit të veprimeve operacionale, janë realizuar këto ekstradime:
Altin Merdani, 46 vjeç, u ekstradua nga Greqia në Shqipëri. Ai është dënuar nga Gjykata e Gjirokastrës në vitin 2017 me 4 vjet e 8 muaj burg për “Prodhim dhe shitje të narkotikëve”. Në vitin 2015, në bashkëpunim me dy shtetas të tjerë, transportoi rreth 100 kg kanabis në fshatin Frashër, Përmet. Gjatë aktivitetit kriminal, ndaj tyre u qëllua me armë dhe një prej bashkëpunëtorëve mbeti i plagosur. Merdanit i mbeten për të vuajtur rreth 2 vjet e gjysmë burg.
Fatmir Isollari, 58 vjeç, u ekstradua nga Shqipëria në Itali. Ai ishte dënuar nga Gjykata e Apelit në Firence me 7 vjet burg për trafik kokaine, kryer në kuadër të një organizate kriminale.
Xh. H., 30 vjeç, u ekstradua nga Shqipëria në Itali. Ai ishte në kërkim nga Gjykata e Romës, e cila i ka caktuar masën “Arrest në burg” për trafikim narkotikësh, pjesëmarrje në komplot kriminal dhe zhvatje në rrethana rënduese.
A. A., 27 vjeç, u ekstradua po ashtu nga Shqipëria në Itali, në bazë të një urdhër-arresti të lëshuar nga Gjykata e Romës për veprën penale “Trafikimi i lëndëve narkotike”.
Policia e Shtetit, në bashkëpunim me INTERPOL-in, konfirmon se do të vijojë punën intensive për kapjen dhe ekstradimin e personave të shpallur në kërkim ndërkombëtar.
/vizionplus.tv
