Ervin Dervishi është përgjegjësi i sektorit të policisë së qarkullimit rrugor të Qarkut të Korçës, duke zëvendësuar në këtë detyrë Artan Bonin, i cili ka kaluar në një detyrë tjetër brenda strukturave të policisë së Shtetit.
Pas riorganizimit të policisë, sektori i qarkullimit rrugor ka qënë ai që ka pësuar ndryshimet më të mëdha.
Në këto kushte nuk ka më varësi nga komisariatet por vepron si sektor më vete në varësi direkte nga titullari i drejtorisë vendore të policisë së Korçës.
Burime brenda këtij sektori bëjnë me dije se në këtë periudhë që përkon edhe me çeljen e sezonit të ri turistik, janë shtuar masat me qëllim sigurinë rrugore nga pika e kalimit kufitar të Kapshticës e deri në Qafën e Thanës, ku edhe fluksi i lëvizjeve mendohet të jetë më i madh.
Në këtë aks rrugor, janë të vendosur gjashtë patrulla të policisë rrugore, ndërkohë që nuk janë lënë jashtë vëmendjes edhe akset e tjera të rrugëve nacionale por edhe atyre rurale.
Gjatë kësaj periudhe vëmendje i është kushtuar edhe trafikut në veçanti në qytetet e Korçës dhe të Pogradecit, pasi numri i mjeteve që lëvizin nëpër qytete në këtë periudhë të sezonit turistik pritet që të dyfishohet.
