Ekspozita ndërkulturore “aDigital Perspective” është hapur në Galerinë “GOCAT” në Tiranë, si një fryt i bashkëpunimit mes Fondacionit Mane dhe Ambasadës Italiane.
Ky projekt, i mbështetur nga Institutet Italiane të Kulturës në Tiranë, Beograd dhe Bukuresht, sjell për herë të parë për artdashësit e qytetit veprat analoge të 10 artistëve të rinj nga Italia dhe Ballkani.
Artistët komunikojnë përmes instalacioneve, fotografive dhe pikturave ndikimin e dixhitalizimit në artin bashkëkohor.
Marco Bassan, kuratori i ekspozitës, thotë se kjo ekspozitë është novatore për nga mënyra se si kërkon të komunikojë me komunitetin artistik.
“Ne mendojmë se ekspozita që kemi sjellë brenda hapësirës së galerisë është novatore për diskutimin e artit dixhital, pasi nuk flitet për vepra dixhitale, por për vepra analoge që të bëjnë të reflektosh mbi dixhitalizimin”, tha Marco Bassan.
“aDigital Perspective” do të qëndrojë e hapur deri më 31 mars dhe më pas do të udhëtojë në qytete të tjera si Beograd, Bukuresht dhe Prishtinë.
“GOCAT” është një dhuratë e Fondacionit Mane për kryeqytetin, ku artistët mund të promovojnë punën e tyre pa pagesë dhe artdashësit mund të shijojnë artin bashkëkohor falas.
/vizionplus.tv
