Kandidati për deputet i PS në Qarkun e Tiranës, Eduard Shalsi konfirmoi për “Vizion Plus” objektivin e socialistëve për të siguruar jo më pak se 19 mandate në kryeqytet. Në një intervistë për edicionin qendror të lajmeve, Shalsi u shpreh se ky është një objektiv i arritshëm, duke pasur parasysh kundërshtarin politik.
“Objektivi është jo më pak se 19, ndërkohë mundësia është edhe për 20 mandate në Tiranë. Jo thjesht dëshirë, por duke marrë në konsideratë se Tirana ka parë investime të jashtëzakonshme në 5-6 vitet e fundit. Kryetari i opozitës u provua në Tiranë dhe të gjithë qytetarët e Tiranës e panë fare qartë se nuk ishte në gfjendje të bënte asgjë. Çdokush sot që pyetet a mbani mend ndonjë vepër, nuk ka çfarë thotë. Ka disa pseudokauza të opozitës, si beteja për këndin e lojërave te Liqeni Artificial. Janë dy alternativa qartësisht të dallueshme nga njëra-tjetra.”
Mes të tjerash, ministri i Shtetit për Sipërmarrjen sulmoi përfaqësuesit e opozitës, duke deklaruar se ata nuk kanë reflektuar për asgjë. Sa i takon rimëkëmbjes pas tërmetit, Eduard Shalsi nënvizoi se sipërmarrjes i është qëndruar shumë pranë. Sipas tij, kriza e tërmetit po kthehet në një mundësi të jashtëzakonshme rritjeje.
