Ambasadori i Bashkimit Evropian, Luigi Soreca apeloi qytetarët që të dielën të ushtrojnë të drejtën e tyre për të votuar.
Pas një takimi që pati me Komisionerin Shtetëror të Zgjedhjeve, Ilirjan Celibashi, Soreca deklaroi se zgjedhjet e të dielës janë shumë të rëndësishme e se BE do të monitorojë nga afër të gjithë procesin.
“Ne kemi ardhur këtu për të diskutuar me kryekomisionerin Celibashi, për përgatitjen e zgjedhjeve të 25 prillit. Na tregoi për situatën deri më tani. Na foli për përgatitjet për identifikimin elektronik dhe votimin elektronik. Gjithcka është thuajse gati. Një aspekt shumë i rëndësishëm ka qenë edukimi i votuesve është bërë në mënyrë shumë të mirë, dhe përgëzojmë komisionerin për punën e mirë. Kemi dhënë mbështetjen tone. Nga tani, apelojmë gjithë qytetarët shqiptarë të votojnë, të ushtrojnë të drejtën e tyre, sepse është e ardhmja e tyre. Këto zgjedhje janë tejet të rëndësishme dhe BE po ju ndjek në të 60 bashkitë e Shqipërisë. Ajo çfarë ndodh në Tiranë dhe në Shqipëri, do jetë e rëndësishme për BE, Shqipëria është një vend kandidat. Është e rëndësishme se çfarë do të ndodhë ditën e diel në Shqipëri.” theksoi Soreca, ndërsa rezervoi fjalën e fundit për partitë politike.”
Soreca artikuloi një thirrje edhe për partitë politike:
“Fjala ime e fundit është për partitë politike, për të theksuar atë thirrje që kemi bërë gjithmonë për vëtëpërmbajtje dhe të shmangni gjuhën e urrejtjes, gjuhën konfliktuale. Ndaj dilni e votoni, në veçanti të rinjtë.”