Një ngjarje e rëndë u regjistrua në fshatin Plan i Bardhë të Bashkisë së Klosit këtë të enjte.
Një 31 vjeçar vrau veten pas një mosmarrveshjeje me bashkëshorten e tij. Burime nga policia lokale bënë të ditur se 31 vjeçari Arjan Hoxha banues në fshatin Gurrë të Bashkisë Klos, i shpallur në kërkim nga policia për dhunë në familje, kishte shkuar në fshatin Plan i Bardhë tek e familja e gruas së tij për t’i kërkuar rikthimin me të, por nga refuzimi ka vrarë veten.
Fillimisht u raportua se 31 vjeçari kishte kërcënuar familjarët e bashkëshortes, por më pas ngjarja u sqarua. Arjan Hoxha kishte pasur mosmarrveshje me gruan e tij, çka e ka detyruar këtë të fundit të braktisë bashkëshortin dhe të rikthehet tek familja e saj.
Refuzimi i bashkëshortes për tu rikthyer, mësohet se ka qenë shkaku që çoi 31 vjeçarin drejt vetëvrasjes. Burime nga policia e cila ndodhet në vendin e ngjarjes thanë se 31 vjeçari ka vetëm një plumb në gojë, çka mbështet versionin e vetëvrasjes.
Ajo që bi në sy në prifilin e 31 vjeçarit në rrjetin social Facebook është pozimi në shumë foto me armë të llojit automatik e pistoleta.
