Një atentat marrë përsipër nga grupi i Shtetit Islamik goditi sot një automjet të blinduar të NATO-s në qendër të Kabulit duke shkaktuar të paktën tetë të vdekur dhe 28 të plagosur, tre prej të cilëve ushatarë të huaj.
“Viktimat nga shpërthimi, që ndodhi në orët e para të mëngjesit, janë në pjesën më të madhe civilë”, theksoi zëdhënësi i Ministrisë së Brendshme, Najib Danish.
NATO theksoi nga ana e saj se tre ushtarë të koalicionit ishin plagosur.
“Jeta e tyre nuk është në rrezik”, sipas një komunikate të forcave amerikane nën mandatin e NATO-s në Afganistan.
Grupi i Shtetit Islamik mori përsipër atentatin nëpërmjet agjencisë së propagandës Amaq, duke konfirmuar se ishte kryer nga një kamikaz, i cili kishte shpërthyer eksplozivët në bordin e një autoveture.
SHBA-ja ka rritur presionin këto ditët e fundit ndaj luftëtarëve të Shtetit Islamik në Afganistan duke shpresuar eliminimin e çdo pranie të këtij grupi në vend deri në fund të vitit dhe për të penguar xhihadistët me përvojë në Irak dhe në Siri të strehohen në Afganistan.
