Për t’i dhënë rëndësinë e duhur vaksinimit, një 86-vjeçare nga Shën Sofia e Epirit në Kalabri të Italisë u paraqit me veshjen arbëreshe.
Znj. Rosaria është një ndër të paktat që mban ende veshjen tradicionale të kulturës arbërore çdo ditë dhe të njëjtën veshje mbajti edhe për vaksinimin. Kjo është një traditë nga emigrantët shqiptarë në Kalabri.
“Ajo ishte shumë e lumtur që mori vaksinën. Ajo u paraqit në kohën e duhur dhe përveçse donte të fiksonte momentin, ajo shprehu gjithë entuziazmin e saj”, tha kryetari i bashkisë Daniele Sisca.
Ai shtoi se ajo shprehu keqardhje që nuk kishte veshur një fustan më festiv, për t’ju përshtatur rastit. Por u shpreh, sipas kryebashkiakut, se diçka të tillë do ta bëjë kur të marrë dozën e dytë të vaksinës.
