Partia e ekstremit të majtë në Maqedoninë e Veriut ka trazuar bashkëpunimin e opozitës shqiptare me atë maqedonase duke e lënë të pasigurt formimin e shumicës parlamentare që do të rrëzonte qeverinë Zaev me votë mosbesimi.
Disa deputetë shqiptarë kanë refuzuar kategorikisht që të jenë në krah të partisë “E Majta”, e cila ka shprehur qëndrime të hapura kundër shqiptarëve, perëndimit, Nato-s dhe marrëveshjes se Prespës me Greqinë.
SKENDER REXHEPI ZEJD
DEPUTET, “ALTERNATIVA”
“Të gjithë deputetët kemi qenë të bindur që “E Majta” nuk nënshkruan, ishte që do të nënshkruaj PLD-ja, BESA, VMRO-ja dhe ne. Në frymën e kësaj, PO, u dakordova që të jap nënshkrimin dhe do ta jap gjithmonë, çdo nënshkrim kur do të duhet që të largohet e keqja e quajtur BDI për shqiptarët, por jo me çdo kusht. Edhe qëndrimi i Alternativës është dhe gjithmonë ka qenë i tillë që ne nuk guxojmë ta identifikojmë veten me një subjekt politik antishqiptar. Këtë nuk e lejoj në jetën time, të njollos identitetin tim familjar për asnjë çmim”.
Analistët shprehen se qëndrimet e partisë “E Majta” e kryesuar nga Dimitar Apasiev, reflektojnë interesat ruse në Ballkan që ushqejnë forcat e destabilizimit të rajonit dhe të Evropës.
Ndërkohë, lideri i partisë më të madhe opozitare në Maqedoninë e Veriut, Hristian Mickoski është shprehur i bindur se deputetët nuk do të tërhiqen nga marrëveshja e arritur pak ditë më parë mes pesë subjekteve të opozitës, përfshirë edhe “E Majta” e Apasiev, që të gjitha së bashku garantojnë 61 vota.
Mickoski ka paralajmëruar se do të paraqesë mocionin e mosbesimit këtë të hënë, ndërsa votimi i tij bëhet tre ditë pas dorëzimit në Kuvend.
