Dy mina të fshehura prej vitesh në murin e një pallati në Vlorë, ndërhyjnë forcat xheniere

Përgjatë orëve të pasdites, një telefonatë ka mbërritur në Drejtorinë Vendore të Policisë së Vlorës. Bëhej fjalë për dy mina, të cilat ishin evidentuar nga banorët e një pallati 4-katësh në lagjen “Pavarësia”.

Minat besohet se ishin vendosur shumë vite më parë në brendësi të murit, në hyrje të pallatit, pranë një sahati të energjisë elektrike. Amortizimi i murit ka bërë që ato të dallohen nga banorët, të cilët kanë njoftuar policinë.

Efektivët e policisë kanë ndërhyrë duke siguruar territorin dhe më pas kanë pritur forcat xheniere për të bërë të mundur largimin e minave nga pallati.

Me ndihmën e forcave xheniere, minat janë larguar nga pallati pranë zonës së “Aleksandrisë”, duke shmangur rrezikun që vinte prej tyre. Mendohet se bëhet fjalë për armatime të vitit 1997.