Reshjet e pandërprera të shiut kanë shkaktuar përmbytje në disa zona të vendit.
Në fshatin Porodinë të Korçës, 15 banesa u përmbytën si pasojë e daljes së dy përrenjve nga shtrati.
Banorët thanë se niveli i ujit shkoi deri në 1 metër dhe se u mbytën edhe bagëti.
Për banorët kjo është një situatë e përsëritur ndërsa akuzuan autoritetet se gjithçka ka ardhur pas ndërtimit të urës.
Përmbytje u shënuan edhe në qytetin e Durrësit. Kryqëzimi pranë stadiumit Niko Dovana dhe disa rrugë të tjera të qytetit u përmbytën si pasojë e reshjeve të dendura të shiut.
Shkak u bë bllokimi i pusetave ndërsa u shkaktuan vështirësi të shumta në lëvizjen e automjeteve dhe të qytetarëve.
Reshjet sollën probleme edhe në aksin rrugor Pogradec-Lin. Për disa orë ky segment u mbulua nga uji ndërsa u desh ndërhyrja e fadromave të bashkisë për normalizimin e qarkullimit të mjeteve.
