Ndryshe nga kryedemokrati Lulzim Basha, kreu i PAA, Agron Duka pranoi humbjen dhe uroi Partinë Socialiste për fitoren e zgjedhjeve.
Përmes një reagimi në “Facebook”, Duka tha se kundërshtari politik shfrytëzoi gabimet e opozitës.
Ai kritikoi Bashën për vendimet e gabuara dhe u shpreh se duhet t’i jepet fund strategjisë për vjedhjen e votave.
“E nis këtë qëndrim duke uruar Partinë Socialiste për fitoren në zgjedhjet e 25 prillit. E kam ndjekur Lulëzim Bashën edhe kur nuk kam patur të njëjtin mendim, nuk kam qënë në asnjë moment dakort me djegjen e mandateve, as me bojkotimin e zgjedhjeve vendore por prapë së prapë kam respektuar gjithnjë vendimmarrjen brenda koalicionit. Këto vendime të gabuara na kushtuan shumë. Nuk mund të fajësojmë kundërshtarin politik përse përfitoi nga gabimet tona por përkundrazi, duhet të korrigjohemi për të mos i përsëritur ato në të ardhmen edhe pse unë i kam konsideruar të gabuara ato vendime e jam dakortësuar me ndërgjegje të plotë dhe për këtë fajësoj veten dhe jo të tjerët. “Na vodhën, na shtypën, na sakatuan, prandaj do vazhdojmë avazin e vjetër” kjo nuk është strategji pozitive për ne, por më këtë le të merret drejtësia. Nuk dua të diktoj mendimin tim, por si kryetar i PAA duke shprehur edhe mendimin e Kryesisë së PAA, marr përsipër gabimet e bëra dhe i uroj kundërshtarit politik suksese në qeverisjen e ardhshme. Dëshiroj me gjithë zemër që Partia Demokratike dhe Lulëzim Basha të nxjerin mësimet e duhura nga kjo humbje dhe të fitojnë në ndeshjen e rradhës. Urojmë fituesit për katër vitet e ardhshme dhe të punojmë të gjithë bashkë për një opozitë të fortë e konstruktive duke udhëhequr vendin në proceset integruese.”
