Autoritetet në Kosovë kanë deklaruar se hapësira ajrore e vendit është shkelur nga dronë të dyshuar të futur nga Serbia.
Drejtori i përgjithshëm i Policisë, Gazmend Hoxha, tha këtë premte për mediat se misioni paqeruajtës i NATO-n është vënë në dijeni për këto shkelje.
“Kohën e fundit kemi pasur fluturime të dronëve që ne po dyshojmë që po vijnë nga territori i Serbisë në pjesën veriore të Kosovës. Policia është në kontakt me KFOR, jemi duke bërë monitorimin dhe të shohim se çfarë mund të bëhet”, tha Gazmend Hoxha, Drejtori i përgjithshëm i Policisë së Kosovës.
Hapësira e ulët ajrore e Kosovës menaxhohet nga Autoriteti i Aviacionit Civil të Kosovës dhe kompania hungareze HungaroControl-it por në përputhje me rezolutën 1244 të Këshillit të Sigurimit të Kombeve të Bashkuara përgjegjës për sigurinë është komandanti i KFOR.
Hoxha tha se futja e dronëve të huaj në hapësirën ajrore të Kosovës është e rrezikshme për pjesën e kufirit, por për qytetarët jo.
Ndërkohë gjatë kësaj javë, krerët e Kosovës, Presidentja Osmani dhe kryeministri në detyrë Kurti ndodhen në SHBA, ku po zhvillojnë takime dypalëshe. Muajt e fundit, presidenti Trump disa herë ka deklaruar se ka parandaluar një përshkallëzim mes Kosovës dhe Serbisë.
