VIDEO/ Drifte e manovra të rrezikshme me makinë, ndëshkohet i riu në Shëngjin
Një i ri 24-vjeçar është ndëshkuar nga Policia Rrugore e Lezhës, pasi kreu manovra të rrezikshme me automjet në zonën turistike të Shëngjinit, duke rrezikuar sigurinë rrugore dhe duke prishur qetësinë publike.
Ngjarja u bë publike pas publikimit të një videoje në platformën “Harta Digjitale e Aksidenteve Rrugore”, ku shfaqej një automjet tip “BMW” duke lëvizur në mënyrë të rrezikshme. Pas verifikimeve të kryera nga shërbimet e Policisë Rrugore, u identifikua drejtuesi i mjetit, shtetasi E. B., 24 vjeç.
Në bazë të nenit 139 të Kodit Rrugor, ai u ndëshkua me një gjobë administrative prej 40.000 lekësh. Gjithashtu, ndaj tij ka nisur procedim penal në gjendje të lirë për veprën penale “Prishja e qetësisë publike”.
Materialet procedurale i janë referuar Prokurorisë së Lezhës për hetime të mëtejshme.
Policia Rrugore e Lezhës ka falënderuar median dhe qytetarët për kontributin në identifikimin dhe denoncimin e rasteve të shkeljes së rregullave të qarkullimit rrugor, duke theksuar se reagimi do të jetë gjithmonë i menjëhershëm, i paanshëm dhe në përputhje me ligjin.
