Borusia Dortmund u bë finalistja e parë e UEFA Champions League që preu një biletë për në duelin e vitit në Uembli më 1 qershor.
Gjermanët eliminuan PSG dhe u konfirmuan surpriza e madhe e këtij sezoni në këtë kompeticion.
Skuadra e Terzic përsëriti fitoren e parë 1 me 0 në fushën e vet, duke fituar edhe ndeshjen e kthimit në Park de Prins me të njëjtat shifra.
Sukses i madh për gjermanët të cilët prej të qenurit në vendin e 5 në Bundeslige, e shohin veten përpara një mundësie të artë për të bërë histori, 27 vite nga suksesi i parë dhe i vetëm në Champions, në vitin e largët 1997.
Dështimi i radhës për PSG, skuadër e cila konfirmon për të disatën herë se paratë mund të blejnë individë, por nuk e blejnë detyrimisht suksesin, sidomos në nivele të tilla.
Përballja e dytë gjysmëfinale e transmetuar në Tring, ishte shumë më pak spektakolare në raport me të parën.
Ekipe të kujdesshme për të mos lënë hapësira, sidomos gjermanët që e pritën Parisin në gjysmëfushën e tyre me shpresën për ta goditur në kundërsulm, sikurse bënë në një rast të pastër të Adejemit që e detyroi Donarumen të bëjë një nga pritjet më të rëndësishme të sezonit.
Në pjesën e dytë PASG ishte praktikisht një tjetër skuadër. Nisja ishte e zjarrtë, por efikasiteti në finalizim dhe fati nuk ishin me të zotët e shtëpisë.
Mbappe, Ramos dhe Zaire Emeri që goditi shtyllën me portën e boshatisur ishin episode që mesa duket donin të tregonin se kjo nuk ishte mbrëmja e parisienëve në të gjitha aspektet, aq saqë minuta më vonë skuadra e Luis Enrikes mori golin vendimtar nga Humels në zhvillimet e një goditje nga këndi.
U deshën disa minuta që PASFG të merrte veten, dhe kur e bëri këtë gjë, qau rastet e humbura sikurse dy moment flagrante të Goncalo Ramos, e pastaj edhe një shtyllë të Nuno Mendesh.
Miqtë i shpëtuan një penalltie për punë milimetrash pas ndërhyrjes së Humels ndaj Dembele, ndërsa në fund në sulmin masiv të francezëve, fati ishte tërësisht kundër tyre dhe shtyllat e tjera të Mbappe e Vitinja e dëshmuan këtë gjë. Feste e madhe e Dortmundit në mes të Parisit dhe për koincidencë bilete për në Uembli, stadiumin e finales së fundit që kanë luajtur në 2013 kundër Bayernit të Mynihit? A do të jetë kështu edhe pas 11 vitesh? Kjo do të shihet sonte.
