Lideri i VMRO DPMNE-së Nikolla Gruevski dorëhiqet nga drejtimi i partisë pas dështimit në zgjedhjet e përgjithshme e më pas edhe ne votimet lokale të muajit tetor.
2 javë më parë Gruevski ishte shprehur se dorëheqja e tij nuk lidhej domosdoshmërish me analizën e rezultatit të zgjedhjeve, pasi i quajti ato të korruptuara, të parregullta e të mbushura me presione, kërcënime, shantazhe dhe blerje votash.
Nga 80 komuna, VMRO DPMNE arriti të fitojë vetëm pesë prej tyre duke shënuar kështu rezultatin më të dobët që nga vendosja e pluralizmit.
Gruevski e mori drejtimin e VMRO DPMNE-së në vitin 2003. Largimi i tij nga partia ndodh në kohën kur ai dhe shumë personalitete të tjera të saj po përballen me procese gjyqësore për vepra të rënda penale.
Ndaj Gruevskit po zhvillohen katër procese për mashtrime zgjedhore, vjedhje tenderash, urdhra për dhunë ndaj zyrtarëve të LSDM-së e vepra të tjera.
Kryetari i ri partisë më të madhe të opozitës do të zgjidhet në kongresin e jashtëzakonshëm, i cili do të mbahet pas dy javësh, më datë 22-23 dhjetor.
Deputetët Ilija Dimovski dhe Antonio Mislloshoski, ish Ministri i Punëve të Jashtme, Nikolla Poposki, ish Ministri i Shëndetësisë Nikolla Dimitrov, Hristijan Mickovski, por edhe emri i ish Kryetarit të partisë, Lubço Georgievski përmenden si kandidatë të mundshëm për kreun e ri të partisë.
