Ankesa e kryeprokurorit Adriatik Llalla për lirimin nga burgu të Domart Konjarit nuk ka marrë asnjë përgjigje nga Këshilli i Lartë i Drejtësisë, në mbledhjen e kësaj të hënë. KLD ka vendosur të pritet rezultati i inspektimit të nisur nga Ministria e Drejtësisë për 5 gjyqtarët e Apelit të Krimeve të Rënda që liruan Konjarin e më pas të vendoset nëse do të ketë apo jo masa për togat e zeza. Konjari u la në masën e sigurisë detyrim paraqitje më 14 mars nga Apeli i Krimeve të Rënda, ndërsa menjëherë pas heqjes së arrestit, reagoi Ambasada Franceze dhe ministri Manjani. Lidhur mbi shqetësimin e ministrit të brendshëm, Saimir Tahiri për gjyqtarin Laurent, Këshilli i Lartë i Drejtësisë i është përgjigjur, duke vendosur inspektim tematik në Gjykatën e Vlorës për të gjitha vendimet qe lidhen me masat e sigurisë dhe çështjet e pronësisë.
