Ish-deputeti i Partisë Demokratike, Gent Strazimiri shkruan se 70% e familjeve shqiptare jetojnë me më pak se 5 dollarë në ditë, e për këtë arsye, sipas tij, duke qëndruar këto ditë të izoluar në shtëpi nuk kanë me çfarë të ushqehen.
Në një postim në “Facebook”, Strazimiri ka akuzuar qeverinë se ka vendosur të shpenzojë 40 herë më pak se ç’shpenzon për oligarkët.
“Korona-virusi namin ka, Oligo-virusi po bën kërdinë! Për 70% të familjeve shqiptare që jetojnë me më pak se 5 dollarë në ditë (burimi Banka Botërore), alternativa nën karantinë është nëse do vdesin nga virusi, apo nga uria… Janë ata që po s’punuan sot, nuk hanë dot sot! Emergjenca virale në këtë vend, shkon në një hap me emergjencën humanitare, por qeveria “socialiste”, me demek “qeveria e të varfërve” ka vendosur të shpenzojë vetëm 3.5 milionë dollarë, ose 40 herë më pak se ç’shpenzon për oligarkët që “na shërbejnë” … kur s’kemi asnjë emergjencë e as nevojë!”
Mes të tjerash, ish-deputeti pohoi se “70% e familjeve shqiptare nuk i lejon Oligo-virusi që të mbrohen nga Korona-virusi”.
