Prej orës 10:00 të mëngjesit të sotëm, vijon debati me tone të ashpra mes deputetëve të opozitës dhe mazhorancës, me akuza dhe kundër-akuza.
Deputeti demokrat Agron Shehaj është përplasur ashpër me Ministrin e Drejtësisë, Ulsi Manja, pasi ka akuzuar këtë të fundit se mashtroi qytetarët me ligjin për Amnistinë, pasi nga ai ligj janë liruar edhe persona të dënuar nga GJKKO për korrupsion.
“Ministri e qeveria kanë gënjyer në mënyrë më të pamoralshme opinionin publik. Tre javë më parë deklaroi se nuk do të përfitojë asnjë i korruptuar, më pas thotë SPAK thotë kanë përfituar. Ti Manja mos e vrit mendjen se nuk e pret njeri dorëheqjen. Unë jam hajdut?! Ti liron të korruptuarit?! Do të thuash që nuk është e vërtetë? Je burrë, jep dorëheqjen. Erdhe këtu dhe gënjeve, mashtrues, jep dorëheqjen. Nuk të vjen mirë që gënjeve këtu. Të pëlqen të gënjesh”, u shpreh Shehaj.
Pas këtyre akuzave ka patur një debat mes tyre, ku ministri Manja nga vendi i ka bërë me dorë se do t’i shkul veshët.
Agron Shehaj: Do më shkulësh veshët mua ti, ministër i Drejtësisë që liron të korruptuarit. Gënjen e nuk ka çfarë thotë.
Por i menjëhershëm ishte reagimi i ministrit Manja i cili theksoi se për çdo akuzë të shpifur për edhe për atë (Shehajn) do të flasë personalisht javën e ardhshme.
Sipas tij Shehaj sponsorizon portale që publikojnë lajme dashakeqe për Shqipërinë.
Manja: Tani që amnistia mori 116 vota na del si kalorës i luftës kundër korrupsionit, kur në fakt ky shtet duhet të merret me ty, se je njeriu evazor më i madh në vend që sponsorizon portale e shkrime që çojnë ujë në mullirin e shteteve dashakeqe të Shqipërisë. Nuk do të jetë e largët dita që fytyra jote prej ëngjëlli e kalorësi të madh të demokracisë e luftës së korrupsionit në këtë vend të dalë ashtu sic është në të vërtetë. Për amnistinë do të jap përgjigje sot një javë ty e të gjithë atyre që tërë këto ditë jeni bashkuar për të manipuluar opinionin publik. Kjo është pse reagova nga vendi se e dua Shqipërinë më shumë se të tjerët. Do të marrësh përgjigje të enjten, por kujdes kur herë tjetër kur drejton gishtin ndaj ministrit të Drejtësisë dhe Ulsi Manjës personalisht. Se kur unë me Asllan Dogjanin luftonim me bandat e krimit të organizuar për të vendosur shtetin zotrote ndërtoje jetën tënde për shtatëpalë qejfe. Do të jap përgjigje sot e java për amnistinë e punën me të cilën merresh ti.
Agron Shehaj: Unë prita përgjigje e më tha flasim të enjten. Por ti nuk e mohon dot. Ke thënë që nuk përfiton dot asnjë I dënuar nga GJKKO. Thashë të vërtetën. Të korruptuarit kanë dalë e ti nuk e mohon dot.
