Policia e shtetit ka parandaluar një ngjarje të rëndë në Cërrik.
Falë ndërhyrjes së shpejtë efektivët kanë bërë të mundur neutralizimin e 29-vjeçarit i cili kishte dhunuar me mjet prerës babain e tij.
Sipas policisë i riu rezulton të ketë probleme të shëndetit mendor.
Cërrik/Ndërhyrja në kohë e shërbimeve të Policisë parandalon një vrasje në familje.
Tentoi të vriste me mjet prerës (kosore) babanë e tij, vihet në pranga 29-vjeçari.
Shërbimet e Komisariatit të Policisë Cërrik, pasi kanë marrë njoftim ditën e djeshme, se në fshatin Klos, Cërrik, shtetasi B. Sh. po konfliktohej me babanë e tij, menjëherë kanë organizuar punën dhe falë ndërhyrjes së shpejtë kanë parandaluar përshkallëzimin e konfliktit që mund të kishte pasoja të rënda.
Falë ndërhyrjes në kohë, shërbimet e Policisë kanë kapur shtetasin B. Sh., 29 vjeç (me probleme të shëndetit mendor), i cili ka dhunuar fizikisht dhe ka goditur me mjet bujqësor (kosore) babanë e tij, shtetasin R. Sh., 56 vjeç, i cili ndodhet jashtë rrezikut për jetën.
Në përfundim të veprimeve, nga specialistët për Hetimin e Krimeve në Komisariatin e Policisë Cërrik u arrestua në flagrancë, për veprën penale “Vrasja për shkak të marrëdhënieve familjare”, mbetur në tentativë, shtetasi B. Sh., 29 vjeç, banues në fshatin Klos, Cërrik.
Materialet hetimore i kaluan Prokurorisë, për veprime të mëtejshme procedurale.
