Shefi i qarkullimit në Policinë Bashkiake të Tiranës, Gentian Vocaj, në një intervistë për Vizion Plus ka njoftuar planin e masave të marrë në ditën e parë të shkollës.
Cilat janë masat që është parashikuar të merren ditën e hënë, që përkon me ditën e parë të shkollës, për të evituar trafikun e rënduar?
“Periudha para fillimit të vitit të ri shkollor nuk është një periudhë e zakonshme në Bashkinë e Tiranës dhe në Policinë Bashkiake në tërësi, është një periudhë e mbushur me takime pune, me organizimi, me takime midis drejtorive të ndryshme të policisë, drejtorive të shkollave, në lidhje me problematikat e ndryshme që mund të kenë. Si rezultat i këtij informacioni është që hartuam një plan masash nga Policia Bashkiake në bashkëpunim edhe me komisariatin e Policisë Rrugore. Plani i masave e ka shtrirjen që në ditët e para të shtatorit, në ditët e fillimit të shkollës dhe në vazhdim. Të gjithë inspektorët e Policisë Bashkiake kanë marrë kontakte me drejtoritë e shkollave dhe me personelin e sigurisë së shkollës, në lidhje me problematikat dhe ku kërkojnë ata ndihmën e Policisë Bashkiake. Për ditën e fillimit të shkollës janë rreth 300 forca të Policisë Bashkiake, të cilat do të jenë në terren të dislokuara në 70 shkolla, kryesisht përpara shkollave, në zonat semaforike dhe në zonat përreth shkollave, ku do të kryhen detyrat e menaxhimit të trafikut, mjeteve e këmbësorëve”, tha ai. “Në bazë të planit në orët e mëngjesit masat do të jenë më të përforcuara”, shton ai duke theksuar se mjetet e tonazhit të rëndë nuk do të lejohet të jenë në qarkullim si dhe mjetet që transportojnë mallrat nuk do të mund të jenë në qarkullim në Unazën e qytetit deri në orën 19:00.
Për ato shkolla pranë të cilave ka kantiere ndërtimi, si do të veprohet?
“Në lidhje me objektet që janë në ndërtim para shkollave nuk kam një informacion të saktë, por mjetet e transportit që transportojnë inerte apo mallra të tjera për këto pallate në ndërtim, nuk do të jenë të autorizuar të hyjnë”, tha ai.
