Pak orë para skadimit të afatit për dorëzimin e koalicioneve në Komisionin Qendror të Zgjedhjeve, Partia Demokratike ende nuk ka mbyllur bisedimet me aleatët e saj. PD ka arritur marrëveshje me Ilir Metën, Fatmir Mediun, Vangjel Dulën dhe Agron Dukën, por është ende në bisedime me Shpëtim Idrizin dhe disa parti parlamentare.
Vetë Berisha sqaroi se marrëveshja për koalicionin, me të cilin opozita do të garojë më 11 maj, do të dorëzohet në orët e vona të mbrëmjes në KQZ. Pasdite pritet të dorëzohet edhe koalicioni i Dashamir Shehit me partinë “Djathtas 1912”.
Mësohet se, pavarësisht bisedimeve, Dashamir Shehi dhe Enkelejd Alibeaj nuk kanë gjetur kompromis me Lulzim Bashën për të garuar së bashku. Nëse orët në vijim nuk sjellin ndonjë surprizë, atëherë Lulzim Basha do të garojë i vetëm me partinë “Koalicioni Euroatlantik”.
Koalicioni i tretë opozitar është ai i partive të reja: “Nisma Thurje” dhe “Shqipëria Bëhet”. Pasdite, edhe Endri Shabani me Adriatik Lapajn do të dorëzojnë zyrtarisht kërkesën për të regjistruar koalicionin në KQZ.
/vizionplus.tv
