Shtesat dhe ndryshimet në ligjin për librin vijojnë të sjellin debate mes botuesve dhe autorëve në komisionin për Kulturën, Turizmin dhe Diasporën.
Teksa botuesit kanë kërkuar një ligj modern për librin, që t’i përgjigjet realitetit të letërsisë sot dhe standardeve evropiane duke bërë pjesë të teknologjisë edhe librin, përmes formave digjitale autorët kanë ngritur të tjera kërkesa.
“Autori mbetet pika me e dobët e hallkes së librit. Një pikë shumë e rëndësishme është formalizimi i tregut të librit.
Autori të ketë mundësinë e kontrollit të shitjes. Të specifikohen në ligj. Kur abuzohet fiton libraria, botuesi por jo autori”, thotë shkrimtari Durim Taçi.
Shkrimtarët kërkojnë përfshirjen në ligj të formalizimit të tregut të librit.
“Tregu informal që kemi me librin dhe ne autorët po e ndjejmë shumë. Nuk kemi asnjë lloj mundësie të verifikojmë sa kopje kemi, sa kopje shiten. Kemi një ide pse letërsia shqipe nuk shitet. Ndërkohë, lexues ka. Lexuesit thonë: ‘E kemi lexuar librin’. Kërkojmë të zhduket informalizimi në tregun e librit ose të ketë më shumë kontroll”, thotë autorja Diana Çuli.
Për librarët formalizimi i tregut ka pasoja të drjetperdrejta në botimet e librit.
“Fiskalizimi në 2021 ka krijuar shumë anomali, ka rritur anomalitetin, shumë biznese të mëdha janë bërë të vogla. Duhet formalizuar tregu. Libri nuk mbijeton dot si ekonomi tregu”, thotë library Albert Gjoka.
Ndërsa u përball me kërkesat e autorëve, Irena Prici përfaqësuese e ministrisë së Kulturës, u ndal te vendosja e taksës së librit prej 6%. Taksë sipas të cilës është vendosur nga ministria e Financave.
“Ministria kërkoi 0%, në Ministrinë e Financave u vendos 6%. Është Ministria e Financave që ka kompetencë për këtë pjesë. Nëse do të ulet, është shumë e mire”, thotë Prici.
Gjatë seancës u kërkua dhe rikthimi i çmimeve kombëtare, veçanërisht i çmimit të letërsisë për fëmijë, vëmendje më e shtuar dhe krijim i më shumë hapësirave publike të dedikuara për librin, si dhe më tepër lirshmëri doganore për botimet e autorëve kosovarë.
