Sulmi në Makivka është cilësuar si një ndër sulmet më të ashpra të forcave ukrainase mbi ato ruse. Sipas Ukrainës mbi dhjetë njësi ruse u asgjësuan teksa mbi 400 ushtarë gjetën vdekjen. Ndërsa si rrallëherë më parë Moska ka pranuar që ka pësuar humbje të paparashikuara në Makavika, por duke theksuar se gjeten vdekjen vetëm 63 ushtarë.
Kjo ka bërë që brenda Rusisë të vërshojnë kritikat kundër udhëheqjes në ushtri. Nacionalistët rusë dhe disa ligjvënës kanë kërkuar ndëshkim për komandantët që ata i akuzojnë për shpërfillje të rreziqeve.
Sergei Mironov, një ligjvënës dhe ish-kryetar i Senatit, dhoma e lartë e Rusisë, kërkoi përgjegjësi penale për zyrtarët që lejuan përqendrimin e personelit ushtarak në një ndërtesë të pambrojtur dhe të gjitha autoritetet më të larta që nuk krijuan nivelin e duhur të sigurisë. Ndërsa Grigory Karasin, një anëtar i Senatit dhe ish-zëvendësministër i Jashtëm kërkoi një analizë të detajuar.
Të tjerë përdorues të rrjeteve sociale theksuan se askush nuk do ta besojë numrin 63 për të cilët flet qeveria, sipas tyre numri është minimizuar dhe se viktimat janë më shumë. Ndërsa një ditë më parë Ukraina deklaroi se ka rrëzuar rreth 80 dronë rusë që nga fillimi i vitit 2023, shumicat e të cilëve prodhim iranian.
