Situata e krijuar në Deçan, ku qindra qytetare u helmuan nga uji i pijshëm shkaktoi debate të ashpra në Parlamentin e Kosovës. Opozita akuzoi qeverinë për papërgjegjshmëri në menaxhimin e situatës. Po ashtu, u kritikua edhe kryministri Albin Kurti, i cili ndodhet ende në Greqi për një vizitë zyrtare.
BESNIK TAHIRI
DEPUTET I ALEANCËS PËR ARDHMËRINË E KOSOVËS
“Një shpërfillje nga kryeministri dhe qeveria me një temë sensitive, çka do të ndodh në rastet tjera. Kryeministri çka kishte mundur të bëjë, ai normal nuk mund të kryejë analiza, dhe të jap injeksione, por është detyrë kushtetuese me u kujdes ndaj qytetarëve në një komunë që nuk udhëhiqet nga ai, por e cila ka infeksion në mijëra njerëz. Kërkojmë që këtë çështje dhe vendimin për ndihma sa ma shpejt ta kthejë në praktikë në Deçan.”
ARMEND ZEMAJ
DEPUTETI I LIDHJES DEMOKRATIKE TË KOSOVËS
“Pasi numri i të helmuarve në Deçan kaloi shifrën 900, kryeministri preferoi të ligjëronte për Aristotelin dhe Platonin në Greqi. Kjo papërgjegjësi tregon paaftësi për të udhëhequr, të dashuruar në vetveten por jo në qytetarin. Duhet të reagojmë ndaj kësaj situate.”
Ministri i Mjedisit, Liburn Aliu tha se sistemi i ujësjellësit është i trashëguar dhe nuk është i mbrojtur .
LIBURN ALIU
MINISTRI I MJEDISIT
“Nga ajo që është parë në teren del një nevojë emergjente për vendin tonë që gjithë sistemin e ujësjellësit në vend të inspektohen dhe të merren masa. Pasi ne mund të konkludojmë që sistemi i ujësjellësit KRU Hidrodrini, në lokacionin në fjalë, realisht nuk është i mbrojtur. Pusetat janë të qasshme, rezervari mund të jetë lehtë i qasshëm, mënyrën si është bërë klorizimi i ujit është bërë në mënyrë manuale. Ne e kemi marrë me seriozitet inspektimet dhe dalje ne një raportimi lidhur me sigurinë e sistemeve të ujësjellësit në vendin tone.”
Ndërkohë, ish-kryeministri Ramush Haradinaj, gjatë një interviste për mediat vendase, bëri të ditur se edhe ai dhe familjarët ishin prekur nga helmimi.
Rezultatet e fundit treguan se uji në fshatin Drenoc në komunën e Deçanit ishte i ndotur, pasi në mostrat atje janë gjetur vlera të shtuara të baktereve koliforme dhe esheria koli.
