Ish-ushtaraku Arben Çuko, në analizën e tij mbi atë që po ndodh në Lindjen e Mesme, paralajmëroi se konflikti do të përhapet në të gjithë globin.
Sipas tij, sot jemi në një konflikt të ngjashëm me atë para Luftës së II Botërore, vetëm se sot, në vend të Japonisë, është Kina.
Pjesë nga biseda:
Çuko: Në nëntor të vitit që shkoi doli strategjia e re kombëtare e SHBA-së, ku interesat e SHBA-së janë hemisfera perëndimore dhe Paqësori. Kush është në Paqësor? Është Kina. Po të bësh analogjinë me parafillimin e Luftës së II Botërore në Paqësor, është paralelisht si me Japoninë. Japonia ishte e fuqishme dhe SHBA, për ta frenuar, bëri embargon e naftës, dhe Japonia e vetmja gjë që bëri ishte se sulmoi SHBA-të.
Loli: Por nuk ka ndodhur.
Çuko: Do të ndodhë. Gjeostrategjia nuk ka ndjenja njerëzore, as moral e as diplomaci. Diplomacia nuk ka punë më, tani kanë punë topat. Ndërprerja e linjës së komunikimit kinez është bërë e qartë që në 2002: Rusia, Kina, Koreja e Veriut, Irani. Koreja e Veriut tha se nëse do të kenë nevojë për raketa, ne do t’ua japim. Koalicioni perëndimor, fatkeqësisht, ka probleme. Ndikimi i luftës te ne është ekonomik, por ndikimi i vërtetë është ajo që parashikohet të ndodhë. Në rastin më të keq, largimi i SHBA-së nga Europa dhe fokusimi në Paqësor, çfarë duhet të bëjmë ne?
