Policia italiane në Verona ka arrestuar katër shqiptarë, pasi dyshohet se vepronin si një bandë e organizuar grabitësish, të njohur si “skifterë”, duke kryer vjedhje të shumta në banesa dhe biznese.
Prokuroria Publike dhe Policia e Shtetit italiane konfirmuan këtë të martë finalizimin e operacionit dhe dërgimin para gjykatës të katër shqiptarëve, të moshës nga 25 deri në 28 vjeç.
Hetimi u nis nga Seksioni i Krimeve kundër Pronës i Policisë së Veronës, pas një rritjeje të konsiderushme të vjedhjeve me thyerje banesash, të regjistruara gjatë muajve nëntor-dhjetor në këtë provincë.
Autoritetet konstatuan se grabitjet ishin të mirëorganizuar dhe me role të ndara qartë mes anëtarëve të grupit.
Agjentët arritën të identifikonin një automjet që përdorej në të gjitha vendngjarjet, duke çuar në përfundimin se bëhej fjalë për të njëjtën bandë kriminale, shkruajnë mediat e huaja.
Sipas policisë, grupi vepronte në lagje të ndryshme të qytetit, kryesisht në orët e pasdites dhe të mbrëmjes. Dy persona qëndronin në makinë për të monitoruar zonën, ndërsa dy të tjerët, të pajisur me mjete thyerjeje, përfshirë edhe një tub uji të fshehur në një çantë dore, ngjiteshin në ballkonet e kateve të sipërme dhe hapnin me forcë dritaret.
Ata mbanin komunikim të vazhdueshëm me bashkëpunëtorët në automjet përmes radiove, hynin në banesa dhe i përmbysnin ato në kërkim të bizhuterive, sendeve të arit dhe parave cash. Edhe kasafortat hapeshin me mjete të specializuara. Çdo grabitje zgjaste nga 5 deri në 15 minuta.
Më 19 dhjetor, pasi kryen dy vjedhje me thyerje banesash në rrugët Via Oliosi dhe Via Cristoforo Colombo, njëra prej të cilave përfshinte vjedhjen e një kasaforte me bizhuteri ari dhe para, banda u ndalua nga policia gjatë kthimit në Garda, një komunë pranë vendit ku ata qëndronin përkohësisht.
Katër shqiptarët, të gjithë me precedentë u arrestuan nën dyshimin për vepra të rënda penale.
Gjatë kontrollit të automjetit, policia gjeti një kasafortë, bizhuteri, para të gatshme, mjete të shumta për thyerje, një çelës fleksibël me gjashtë disqe për hapjen e rrjetave dhe kasafortave, si edhe tre radio me dy drejtime.
Bastisja e banesës ku qëndronin çoi në sekuestrimin e sasive të tjera të bizhuterive, parave dhe sendeve me vlerë, që dyshohet se janë të vjedhura. Grupi po hetohet edhe për grabitje të tjera të ngjashme të denoncuara më herët.
Pas përfundimit të hetimeve paraprake, katër të arrestuarit u dërguan në burgun “Montorio” të Veronës, në dispozicion të prokurorisë së çështjes.
/vizionplus.tv
